Kryetari Rama lëshon alarmin: Kosova në rrezik real për të humbur Lojërat Mesdhetare 2030

Kryetari i Prishtinës, Përparim Rama, ka ngritur alarmin se vendi ynë rrezikon seriozisht t'i humbasë Lojërat Mesdhetare të vitit 2030. Përmes një reagimi publik në rrjetet sociale, ai ka bërë të ditur se paralajmërimet e tij të mëparshme tashmë po marrin konfirmim zyrtar nga ana e Komitetit Ndërkombëtar të Lojërave Mesdhetare (ICMG). Duke renditur hapat e ndërmarrë nga niveli lokal, Rama ka theksuar se kryeqyteti i ka kryer me përpikëri të gjitha detyrimet e veta institucionale, duke përfshirë përpunimin e masterplanit, caktimin e lokacioneve, përcaktimin e projekteve konkrete, si dhe miratimin e tyre zyrtar në Kuvendin Komunal. “Prishtina i ka fituar Lojërat Mesdhetare 2030. Kemi punuar në Masterplan, kemi përcaktuar projektet dhe lokacionet. I kemi votuar në Asamblenë e Kryeqytetit”, ka shkruar ndër të tjera i pari i Prishtinës. Megjithatë, kreu i komunës ka drejtuar akuza të rënda në adresë të ekzekutivit qendror dhe Komitetit Organizativ, duke pohuar se mungesa e angazhimit të tyre po rrezikon një ngjarje me peshë kaq të madhe për vendin. “Tash, kur është radha e Qeverisë qendrore dhe Komitetit Organizativ, në krye të të cilit Albin Kurti e ka vendosur vetveten, si asnjë shtet tjetër, Kosova po rrezikon ta humbasë këtë mundësi historike!”, ka deklaruar Rama. Në fund, ai ka bërë të ditur se ICMG-ja ka konstatuar mungesën e përgjigjeve adekuate nga institucionet qendrore. Sipas tij, më 19 dhjetor është parashikuar të analizohet gjendja aktuale dhe të ndërmerren hapat e mëtejmë përmes thirrjes së një Asambleje të Jashtëzakonshme, e cila do të vendosë përfundimisht mbi fatin e këtij organizimi të madh sportiv.