Leclerc paralajmëron kthesën e Ferrarit: Synojmë hapin vendimtar në Austin

Skuadra e Ferrarit ishte shumë pranë triumfit në Singapor, megjithatë fitorja i iku sërish nga duart ekipi me seli në Maranello. Gjatë kësaj periudhe, Mercedes është shfaqur i cenueshëm në disa raste, një situatë që u shfrytëzua më së miri nga McLaren menjëherë pas pushimeve verore. Megjithatë, aktualisht, Mercedes duket se po kalon një fazë çorientimi pas paketës së fundit të përmirësimeve të sjella në Malajzi, ndërkohë që dyshja Verstappen-Red Bull është rikthyer fuqishëm në majë të renditjes. Për të mos mbetur pas, skaudra italiane ka përgatitur ndryshime rrënjësore për Çmimin e Madh të radhës në Austin. Piloti Charles Leclerc shpreh besimin se bolidi SF-26, i cili po vuan për të ruajtur ritmin përballë konkurrentëve, do të përfitojë ndjeshëm nga ky zhvillim teknik. “Nuk mund ta anashkalojmë ecurinë e vënë re gjatë tri garave të fundit,” u shpreh Leclerc, duke shtuar: “Bëhet fjalë për një rënie të ritmit tonë në krahasim me Red Bull, Mercedes, e madje edhe me McLaren”. “Në fund të ditës, gjëja kryesore është se kush arrin t’i implementojë risitë teknike në pistë sa më shpejt të jetë e mundur. Shpresojmë me zemër se do të jemi pikërisht ne ata që do të realizojmë hapin më të madh përpara ndaj konkurrentëve tanë, falë paketës së re që do të debutojë së shpejti,” përfundoi ai.