Kriza e Bukovës: Si po helmohet Ohri dhe turistët nga tymi i deponisë

Për banorët dhe vizitorët e Ohrit, deponia e Bukovës është shndërruar në një shqetësim të përhershëm, pasi përgjatë gjithë stinës së verës ajri është ndotur rëndë. Pavarësisht se ky vendgrumbullim mbeturinash ndodhet rreth 20 kilometra larg qytetit, erërat e rënda dhe tymi i dendur arrijnë deri në zonat e banuara. Përveç djegieve spontane, kjo hapësirë shpesh përballet edhe me zjarrvënie të qëllimshme. Ngjarja e fundit u shënua javën e kaluar, kur sigurimi fizik konstatoi praninë e tre personave të paautorizuar brenda perimetrit, të cilët rrezikonin të shkaktonin flakë. Autoritetet policore trajtuan rastin, ndërsa Prokuroria vendosi masën e paraburgimit prej 30 ditësh për të dyshuarit, për shkak të rrezikut të arratisjes dhe mundësisë së ndikimit te dëshmitarët. Sipas njoftimit zyrtar nga Prokuroria, më 17 shtator tre bashkëpunëtorët hynë në deponinë e Bukovës me një kamion të mbushur me mbeturina dhe nisën djegien e kabllove me qëllim përfitimin e telave të bakrit. Ky veprim liroi substanca të rrezikshme dhe tym helmues në atmosferë. Për këtë arsye, Prokuroria Publike e Ohrit ka iniciuar procedurë hetimore ndaj tre personave për veprën penale të rrezikimit të mjedisit jetësor dhe natyrës. Nga Ndërmarrja Publike “Komunalec” pranojnë se çdo incident me zjarrin në këtë deponi sjell pasoja të rënda për shëndetin e qytetarëve. Për të parandaluar situata të tilla, drejtori i kësaj ndërmarrjeje, Vanço Kostoski, theksoi se vendgrumbullimi do të vendoset nën vëzhgim 24 orë në ditë nga të gjitha anët. Ai shtoi se kjo masë ndihmon në zbulimin e menjëhershëm të ndezjeve të qëllimshme, por edhe të atyre spontane që ndodhin gjatë muajve të nxehtë si pasojë e gazrave. Gjithashtu, Kostoski bëri të ditur se kryhen rregullisht analiza të tokës, ndërsa mbulimi me dhe mbetet metoda e vetme mbrojtëse për këtë lloj deponie. Ekspertët e mjedisit e cilësojnë deponinë e Bukovës si ndër pikat më kritike në vend, e cila përbën rrezik afatgjatë për shkak të afërsisë me Liqenin e Ohrit. Ambientalisti Gjoko Zoroski u shpreh se ky vendgrumbullim nuk posedon infrastrukturë adekuate mbrojtëse, pasi mungojnë hidroizolimi dhe sistemet për grumbullimin e ujërave të kulluara. Sipas tij, mungon edhe kontrolli i gazrave, ndërsa lëngjet që rrjedhin përmbajnë metale të rënda, ndotës organikë, amoniak dhe nitrite, të cilat depërtojnë si drejt basenit të Ohrit ashtu edhe të Prespës. Zjarret e shpeshta dhe vetëndezja nga prania e metaleve lirojnë grimca të rrezikshme PM në ajër, duke e bërë ndotjen e Ohrit një dukuri të shpeshtë. Ndërkohë, kapacitetet e deponisë së Bukovës kanë kapërcyer prej kohësh kufijtë e lejuar, ndaj autoritetet lokale vlerësojnë se zgjidhja e vetme afatgjatë mbetet ndërtimi dhe vënia në funksion e një deponie rajonale.