Stambolli nën pushtetin e ujërave: Ndërrojnë jetë dy persona, qindra objekte përmbyten dhe pezullohet mësimi

Reshjet e dendura të shiut kanë shkaktuar stuhie dhe vërshime kaotike në qytetin më të madh të Turqisë, Stamboll, duke lënë të vdekur dy persona. Stuhia e fuqishme ka bllokuar rrugët kryesore dhe ka përmbytur me qindra shtëpi e objekte afariste, duke paralizuar pjesërisht jetën në këtë metropol. Sipas njoftimeve të agjencisë shtetërore turke Anadolu, një grua 34-vjeçare pësoi aksident fatal në lagjen Sarıyer, pasi u rrëzua gjatë përpjekjes për të kaluar një rrugë të vërshuar nga uji. Edhe pse u dërgua me urgjencë në spital, ajo nuk arriti të mbijetonte. Ndërkohë, një tragjedi tjetër u shënua në zonën Balat, ku një 14-vjeçar humbi jetën nga goditja e rrymës elektrike pasi shkeli në një pellg me ujë. Rrebeshet intensive që kapluan qytetin të mërkurën, më 14 tetor, shkaktuan përmbytje masive në disa lagje. Qarkullimi u rëndua skajshmërisht, pasi me dhjetëra automjete mbetën të bllokuara në rrugë, ndërsa disa të tjera u morën përpara nga rrjedha e fuqishme e ujit. Të dhënat e publikuara nga Guvernatori i Stambollit tregojnë se nga ora 06:00 deri në orën 20:00 të së mërkurës, linjat e emergjencës pranuan gjithsej 2 mijë e 518 thirrje për ndihmë. Në këtë bilanc janë regjistruar 1 mijë e 277 raste përmbytjesh, 15 rrëshqitje dheu si dhe 47 situata ku personat kishin mbetur të bllokuar. Po ashtu, u raportuan dëme nga uji në 808 banesa dhe 280 biznese. Për menaxhimin e kësaj gjendjeje kritike, autoritetet kanë angazhuar rreth 8 mijë punonjës emergjence, të mbështetur nga 2 mijë mjete operative dhe makineri të rënda. Situatë mjaft e rëndë u regjistrua në lagjen Ayazağa të Sarıyerit, ku rreth 200 punonjës mbetën të ngujuar në ambientet e tyre të punës. Ekipet e shpëtimit, duke përfshirë agjencinë e emergjencave AFAD, zjarrfikësit dhe njësitë e kërkim-shpëtimit, ndërhynë gjatë gjithë natës duke evakuuar punonjësit me kamionë dhe minibusë. Në disa raste u desh ndërhyrja e makinerive të rënda për të nxjerrë qytetarët e bllokuar brenda mjeteve të tyre. Përmbytjet nuk kursyen as monumentet historike. Në zonën Kağıthane, lumi doli nga shtrati duke përmbytur xhaminë historike të Sadabadit dhe ndërtesat përreth. Uji depërtoi edhe në brendësi të objektit fetar, me ç’rast autoritetet ndaluan hyrjen për arsye sigurie. Për shkak të kushteve të përkeqësuara atmosferike, Guvernatori i Stambollit mori vendim për pezullimin e procesit mësimor në të gjitha institucionet arsimore publike dhe private për ditën e enjte, më 15 tetor. Ndër masat e tjera parandaluese përfshihen kufizimi i qarkullimit të motoçikletave dhe leja administrative për disa kategori të punonjësve publikë. Autoritetet u kanë bërë thirrje qytetarëve të shmangin lëvizjet e panevojshme, ndërsa banorët që jetojnë në katet nëntokësore janë këshilluar të strehohen përkohësisht në vende më të sigurta. Shërbimi meteorologjik turk ka paralajmëruar se reshjet e shiut dhe stuhitë do të vazhdojnë edhe gjatë së enjtes, derisa ekipet e emergjencës mbeten në gatishmëri të plotë në terren.