Tiranë në gjendje alarmi: Dhjetë orë tensione, sulme mbi institucione, banka dhe biznese

Kryeqyteti është përfshirë nga një valë e gjerë dhune dhe përplasjesh gjatë një proteste që ka zgjatur plot dhjetë orë, duke lënë pas dëme të konsiderueshme materiale në objekte publike dhe private. Turma e protestuesve ka lëvizur nga një zonë në tjetër të Tiranës, duke vënë në shënjestër institucione shtetërore, qendra tregtare, biznese dhe banka, ndërsa forcat e rendit janë kundërpërgjigjur në disa raste me gaz lotsjellës dhe ujë me presion për të shpërndarë turmën. Tensionet nisën fillimisht pranë Ministrisë së Arsimit, ku godina u ballafaqua sërish me gurë dhe flakë. Persona me fytyra të mbuluara shkulën kangjellat e trotuareve dhe i përdorën për të goditur institucionin. Situata vijoi e tensionuar përgjatë Rrugës së Durrësit, ku u shkatërruan disa biznese private dhe u dogj plotësisht një bankë e nivelit të dytë. Më pas, protestuesit u drejtuan për te Sheshi “Skënderbej”, duke u vënë flakën stolave dhe kazanëve të mbeturinave. Një tjetër vatër e nxehtë ishte Ministria e Ekonomisë, ku manifestuesit depërtuan në katin e parë të godinës, duke thyer xhama, shkulur dyer dhe nxjerrë orenditë jashtë. Sulme të ngjashme u regjistruan edhe në Ministrinë e Brendshme, ku u dëmtuan xhamat e ndërtesës, si dhe te Ministria e Drejtësisë, ku u vu flaka në katin e parë pas thyerjes së xhamave. Më tej, protestuesit u ndanë në dy grupe, duke u zhvendosur në Bulevardin “Dëshmorët e Kombit” për të sulmuar ndërtesat përgjatë tij. Dëmtime të rënda u shënuan te Piramida e Tiranës, ku u dogjën dhe u shkatërruan pjesë të ambienteve, si dhe u sulmua një tjetër bankë private. Trazirat vijuan te Kryeministria, ku u dogjën pemët në hyrjen anësore, si dhe te Kryesia e Kuvendit, ku pati tentativë për t'u futur me dhunë brenda. Vagabondazhi i dhunshëm preku edhe zonën e “Kullave Binjake”, ku u shkatërruan dhe u dogjën bizneset e vendosura në katin e parë të dy godinave, ndërsa një grup tjetër vandalizoi xhamat e qendrës tregtare pranë Kalasë së Tiranës. Gjatë gjithë këtij harku kohor prej dhjetë orësh, policia ndërhyri në pika të ndryshme kritike për të neutralizuar situatën dhe për të zmbrapsur turmat e irrituara.