Përleshjet në Tiranë, Delegacioni i BE-së lëshon reagimin e fortë për protestën e studentëve

Delegacioni i Bashkimit Europian në Shqipëri ka shprehur shqetësimin e tij të thellë lidhur me tensionimin dhe kalimin në dhunë të tubimit të studentëve, i cili u zhvillua para godinës së Ministrisë së Arsimit në kryeqytet. Nëpërmjet një deklarate të publikuar në platformat e komunikimit digjital, zyra e BE-së në Tiranë nënvizon se e drejta për t'u tubuar dhe për të shprehur mendimin përbëjnë shtylla kurrizore të demokracisë dhe vlera të panogociueshme europiane, të cilat domosdoshmërisht kërkojnë respektim dhe ushtrim paqësor nga të gjithë. Diplomatët europianë i kanë drejtuar një thirrje urgjente palëve për të ulur gjakrat dhe për të shmangur çdo eskalim të mëtejshëm të situatës në terren, duke i dhënë hapësirë komunikimit dhe zgjidhjes përmes bisedimeve. “Ne shprehim shqetësim në lidhje me përshkallëzimin e dhunshëm të protestës në Tiranë. Liria e tubimit dhe e shprehjes janë të drejta themelore dhe vlera themelore evropiane. Ato duhet të respektohen dhe të ushtrohen në mënyrë paqësore. Ne jemi në dijeni të pretendimeve për përdorim të tepruar të dhunës nga policia ndaj protestuesve dhe gazetarëve. Presim që veprimet e policisë të jenë proporcionale dhe të respektojnë të drejtat themelore, siç edhe presim që këto raste të hetohen me përparësi. Inkurajojmë të gjitha palët të ulin tensionet. Dialogu konstruktiv ndërmjet të gjithë aktorëve të përfshirë është e vetmja rrugë përpara”, thuhet në reagimin e delegacionit të BE-së.