Seanca e re e Kuvendit: Zgjedhje në BQK e RTK dhe ligji kundër pastrimit të parave në fokus

Kuvendi i Kosovës do të mbajë nesër seancën e radhës plenare, e cila është parashikuar të nisë në orën 10:00. Përmes një njoftimi zyrtar, është bërë e ditur axhenda e plotë e punimeve që do të ketë përpara legjislativi. Në rendin e ditës përfshihen disa çështje të rëndësishme institucionale dhe legjislative, ku spikat zgjedhja e dy anëtarëve joekzekutivë të Bordit të Bankës Qendrore të Republikës së Kosovës (BQK). Po ashtu, deputetët do të shqyrtojnë formimin e Komisionit Ad-Hoc për përzgjedhjen e anëtarëve të rinj të Bordit të Radiotelevizionit të Kosovës (RTK), konkretisht dy nga komuniteti shqiptar, një nga ai serb dhe një nga komunitetet e tjera jo shumicë. Sipas njoftimit të lëshuar nga Drejtoria për media dhe marrëdhënie me publikun e Kuvendit, seanca do të hapet me miratimin e procesverbaleve nga mbledhjet e kaluara, për të vazhduar me deklarimet e deputetëve jashtë rendit të ditës. Një tjetër pikë e rëndësishme në këtë seancë do të jetë edhe shqyrtimi i dytë i Projektligjit nr.11/L-017, i cili synon ndryshimin dhe plotësimin e Ligjit Nr. 05/L-096 për Parandalimin e Pastrimit të Parave dhe Luftimin e Financimit të Terrorizmit. Gjithashtu, në axhendë figuron edhe propozimi i Grupit Parlamentar të Listës Serbe për caktimin e deputetëve të tyre në komisionet përkatëse parlamentare.