Goditje e rëndë për Hoffenheimin: Albian Hajdari pëson sërish lëndim

Përfaqësuesi i Kosovës dhe qendërmbrojtësi i skuadrës gjermane Hoffenheim, Albian Hajdari, është përballur sërish me fatkeqësi, pasi ka pësuar një dëmtim të ri që do ta detyrojë të qëndrojë larg fushave të blerta për një periudhë kohore. Lajmi është konfirmuar zyrtarisht nga vetë klubi i Hoffenheimit, i cili ka bërë të ditur se futbollisti kosovar do të mungojë për të paktën disa javë, duke lënë boshllëk të ndjeshëm në repartin defensiv. Sipas njoftimit të lëshuar nga klubi gjermani në rrjetet sociale, ylli i Përfaqësuesores dardane ka dëmtuar shputën e këmbës gjatë seancës stërvitore të zhvilluar ditën e djeshme, ndërkohë që skuadra po përgatitej intensivisht për sfidën e Ligës së Evropës kundër Besiktasit. “Albian Hajdari ka pësuar një lëndim të fascies plantare (shputës) gjatë stërvitjes së djeshme dhe nuk do të jetë i gatshëm për ndeshjet e ardhshme gjatë javëve në vijim”, thuhet në njoftimin e klubit të Hoffenheimit. Ky lëndim vjen në një moment tejet delikat për lojtarin, i cili sapo ishte bashkuar me grupin pas një dëmtimi të pësuar gjatë grumbullimit me kombëtaren e Kosovës në ndeshjen kundër Irlandës në Ligën e Kombeve. Për shkak të atij problemi fizik, Hajdari kishte munguar në takimin ndaj Austrisë në kuadër të xhiros së dytë, ndërsa ishte kthyer në Gjermani para duelit me Izraelin, pasi u konfirmua se nuk do të mund të kontribuonte në dy përballjet e radhës të dardanëve ndaj Izraelit dhe Austrisë. Ky është sezoni i dytë i Albian Hajdarit në fanellën e Hoffenheimit, pasi verës së kaluar ai kompletoi transferimin e tij nga Lugano për shifrën e pesë milionë eurove, ndërkohë që falë paraqitjeve të tij, vlera e tij në treg ka kapur shifrën e 25 milionë eurove. Në radhët e Hoffenheimit bëjnë pjesë edhe dy futbollistë të tjerë shqiptarë të Përfaqësuesores së Kosovës, Leon Avdullahu dhe Fisnik Asllani. Të dy lojtarët kosovarë janë nën urdhërat e trajnerit dhe plotësisht të gatshëm për sfidën që skuadra gjermane do ta luajë nesër në mbrëmje kundër Besiktasit në kuadër të Ligës së Evropës.