Dy dekada e dy vjet dhimbje: Malisheva përkujton 15 maturantët që u shuan tragjikisht në Fushë Arrëz

Ka rënë heshtja e dhembjes në Malishevë, ndërsa sot janë bërë saktësisht 22 vjet nga dita më e zezë e 14 tetorit 2004, kur 15 maturantë të Gjimnazit “Abdyl Frashëri” (sot “Hamdi Berisha”) humbën jetën në një aksident të rëndë rrugor në Fushë Arrëz të Shqipërisë, teksa po ktheheshin nga ekskursioni i tyre në shtetin amë. Kjo ngjarje tragjike, e cila vijon të mbetet ndër plagët më të rënda të Kosovës në periudhën e pasluftës, është shënuar përmes homazheve solemne dhe nderimeve pranë memorialit “Lëndina e Lotëve” në Malishevë, vend ku prehen përgjithmonë trupat e 15 të rinjve. Përveç familjarëve të prekur nga kjo humbje e madhe, në ceremoni morën pjesë krerët më të lartë lokalë, përfshirë kryetarin e Komunës së Malishevës, Ekrem Kastrati, nënkryetarin Vesel Krasniqi, drejtoreshën e Arsimit, Arbëresha Krasniqi, drejtorë të dikastereve komunale, si dhe arsimtarë, nxënës të Gjimnazit “Hamdi Berisha”, ish-gjimnazistë dhe qytetarë të shumtë që u bashkuan në këtë dhimbje të përbashkët. Gjatë fjalës së tij përkujtimore, i pari i Malishevës, Ekrem Kastrati, e cilësoi këtë datë si plagën më të rëndë të komunës dhe mbarë shoqërisë, duke rikonfirmuar mbështetjen e pakushtëzuar institucionale për familjarët që humbën bijtë e tyre në lulen e rinisë. “Kjo është dita më e dhimbshme për të gjithë ne, si komunë e si vend. Ne, si institucione, jemi pranë jush, familje, sepse kemi humbur 15 maturantë në lulen e rinisë. Si komunë, do të përkujdesemi gjithmonë që ta kujtojmë këtë ngjarje të dhimbshme për të gjithë ne”, u shpreh Kastrati para të pranishmëve. Kreu i komunës shprehu gjithashtu mirënjohje të thellë për strukturat shtetërore të Shqipërisë, me theks të veçantë për Bashkinë e Fushë Arrëzit dhe spitalin ushtarak, për ndihmën e jashtëzakonshme që u dhanë të mbijetuarve, organizimin e riatdhesimit të viktimave dhe solidaritetin e treguar në ato çaste të rënda. Aksidenti i rëndë i 14 tetorit 2004 i theu përgjithmonë ëndrrat e maturantëve: Berat Suka, Esat Hajrullahu, Elgadaf Zabelaj, Mifail Morina, Rifat Hoxha, Xhevdet Sertolli, Visar Kafexholli, Agron Berisha, Ajet Rrahmanaj, Esat Rexhaj, Labinot Morina, Lulzim Kastrati, Megzon Sadiku, Rruhi Ulluri dhe Xhevdet Sahitaj. Përveç varrezave të tyre në “Lëndinën e Lotëve” në Malishevë, kujtimi i tyre është përjetësuar edhe në vendin e ngjarjes në Fushë Arrëz, ku është ngritur një obelisk përkujtimor në nderim të jetëve të humbura. Edhe pas plot 22 vjetësh, shpirti dhe kujtimi i 15 djemve mbetet i pashlyer në zemrat e malishevasve, ndërsa kjo tragjedi vazhdon të mbetet një dhimbje e përjetshme për familjet e tyre dhe mbarë kombin shqiptar!