Mario Lemina sqaron polemikat me Lamine Yamalin: Djali im është adhurues i yllit të Barcelonës

Mesfushori i Galatasarayt, Mario Lemina, ka mbyllur përfundimisht situatën e tensionuar dhe thumbimet me talentin e Barcelonës, Lamine Yamal, të krijuara pas deklaratave të bujshme para sfidës direkte në Ligën e Kampionëve. Në prononcimin e dhënë para ndeshjes, futbollisti nga Gaboni ishte treguar ironik para kamerave, duke deklaruar se nuk e njihte 19-vjeçarin spanjoll. Një reagim i tillë kishte sjellë buzëqeshje te ylli i katalanasve, i cili pas triumfit 4-1 në tokën turke, përdori rrjetet sociale për të publikuar pamje nga paraqitja e tij, të shoqëruara me pyetjen provokuese: “A më njeh tani?”. Pas përfundimit të ndeshjes, ish-mesfushori i Juventusit ka dashur të qartësojë se fjalët e tij nuk kishin asnjë prapavijë personale apo nënçmuese ndaj Yamalit. Përmes një postimi në rrjetin social Instagram, ku shihet në shoqërinë e fëmijëve të tij, Lemina ka dhënë një sqarim miqësor. “Sigurisht që e di kush je, djali im i vogël është i çmendur pas teje. Urime!”, ka shkruar mesfushori i ekipit turk, duke treguar respekt për aftësitë e spanjollit. Ndërkohë, pavarësisht rezultatit negativ dhe humbjes së rëndë në shtëpi përballë gjigantit katalanas, Lemina ka shfrytëzuar rastin për t'i dërguar një thirrje motivuese tifozëve dhe bashkëlojtarëve të tij për sfidat e radhës. “Vazhdojmë të luftojmë, do të kthehemi më të fortë”, ka përfunduar mesazhin e tij Mario Lemina.