Krizë me mbeturinat në kryeqytet: Retkoceri kërkon hapjen e Mirashit dhe paralajmëron hapa të rinj

Drejtori i Shërbimeve Publike në Komunën e Prishtinës, Leutrim Retkoceri, i ka bërë thirrje Ministrisë së Mjedisit, Planifikimit Hapësinor dhe Infrastrukturës që të ndërhyjë menjëherë për të gjetur një zgjidhje lidhur me gjendjen e krijuar rreth deponisë së Mirashit. Retkoceri ka kërkuar që brenda natës së sotme, saktësisht në mesnatë, të lejohet hapja e kësaj deponie, çka do t'i hapte rrugë pastrimit të mbeturinave nga Prishtina. Sipas tij, banorët e kryeqytetit nuk duhet të bien pre e kalkulimeve dhe tensioneve politike, duke i bërë thirrje dikasterit qeveritar që të sqarojë në kohë hapat që do të ndiqen. “Qytetarët e Prishtinës nuk duhet ta paguajnë çmimin e përplasjeve politike. Sonte në orën 12:00, kërkojmë që dyert e deponisë në Mirash të hapen për t’u larguar mbeturinat në kryeqytet”, ka deklaruar Retkoceri. Në fund, ai ka lënë të kuptohet se autoritetet komunale nuk do të qëndrojnë duarkryq nëse kjo thirrje mbetet pa përgjigje. “Në të kundërtën, veprimet tona nuk do të jenë më të njëjta”, ka paralajmëruar Retkoceri.