“Askush s’ma kthen motrën”/ Familja kërkon burgim të përjetshëm për Valon Aliun, mbrojtja kërkon rigjykim

Gjykata e Apelit ka shqyrtuar të mërkurën ankesat e palës së dëmtuar dhe mbrojtjes kundër vendimit të Gjykatës Themelore në Ferizaj, e cila më 3 prill 2026 e kishte dënuar Valon Aliun me 24 vjet burgim unik për vrasjen e ish-bashkëshortes së tij, E.C., ngjarje e cila ndodhi në prill të vitit 2024 brenda Qendrës për Punë Sociale në Ferizaj. Përfaqësuesi i palës së dëmtuar, avokati Jeton Berisha (në emër të Drilon Coklit), kishte ushtruar ankesë duke kërkuar që ndaj të pandehurit të shqiptohet dënimi maksimal me burgim të përjetshëm. Sipas palës së dëmtuar, shkalla e parë nuk ka vlerësuar drejt rrethanat rënduese dhe lehtësuese, duke kontestuar gjithashtu sinqeritetin e kërkim-faljes dhe pranimit të fajësisë për armëmbajtje pa leje. Në krahun tjetër, avokati mbrojtës Ramadan Sylejmani ka paraqitur ankesë për shkelje thelbësore të procedurës penale. Ai ka vlerësuar se vendimi aktual është joproporcional dhe nuk pasqyron gjendjen e vërtetë faktike, prandaj ka kërkuar prishjen e aktgjykimit dhe kthimin e çështjes në rigjykim në shkallën e parë. Gjyqtari referues Skender Çoçaj bëri të ditur se Prokuroria e Apelit ka kërkuar miratimin e pjesshëm të ankesës së palës së dëmtuar për t'i caktuar një dënim më të rëndë të akuzuarit, ndërkohë që ka kërkuar refuzimin e kërkesave të mbrojtjes. Gjatë seancës, vëllai i viktimës, Drilon Cokli, mbështeti plotësisht qëndrimin e avokatit të tij dhe kërkoi dënim maksimal, duke theksuar se plaga e familjes nuk shërohet kurrë. “Është e kotë, vitet kalojnë por dhimbja, mungesa e motrës sime do të vazhdojnë gjithmonë. Askush nuk mund ta kthejë motrën time. Asnjë dënim, asnjë gjë. Por, çfarë dua unë - që të jepet një dënim maksimal, që të vetëdijesohet secili njeri, që duhet ta duajë gruan e vet, ta duajë motrën e vet, nënën e vet edhe të mos vijë deri te konflikti apo diçka tjetër”, u shpreh ai, duke shtuar se edhe jeta e tij ishte në rrezik dhe se i ndjeshëmi kishte ndryshuar përgjithmonë pasi e mbajti në duar gjatë momentit tragjik të të shtëna me armë. Këtë kërkesë për dënim maksimal e mbështeti fuqishëm edhe babai i viktimës, Gazmend Cokli, i cili kërkoi drejtësi të plotë sipas ligjit. Në fjalën e tij, i akuzuari Valon Aliu i shprehu ngushëllime familjes dhe insistoi se akti i rëndë nuk ishte kryer me paramendim apo planifikim paraprak. Trupi gjykues i Apelit përbëhet nga Arben Hoti (kryetar), Skender Çoçaj (gjyqtar referues) dhe Xhevdet Abazi (anëtar). Sipas aktakuzës së ngritur më 4 shtator 2024 nga Prokuroria Themelore e Ferizajt, i pandehuri Aliu akuzohet se më 12 prill 2024, në zyrat e Qendrës për Punë Sociale në rrugën “Vëllezërit Gërvalla” në Ferizaj, ka privuar me dashje nga jeta ish-bashkëshorten e tij.