Talenti 17-vjeçar i Partizanit thyen heshtjen pas derbit: Ky është vetëm fillimi

Ndonëse është vetëm 17 vjeç, Elson Himallari po dëshmon cilësitë e tij të spikatura në radhët e skuadrës së parë të Partizanit, duke u kthyer në një nga emrat më premtues të edicionit. Gjatë përballjes derbi kundër rivalëve të kryeqytetit, i riu u shënua si autor i golit të vetëm për “Demat e Kuq”, pasi përfitoi nga një aksion brilant dhe depërtim i fuqishëm i Xhuliano Skukës në zonë. Pavarësisht rezultatit zhgënjyes për skuadrën, sulmuesi i talentuar ka zgjedhur rrjetet sociale për të përcjellë një mesazh motivues për shokët e skuadrës dhe mbështetësit, duke theksuar rëndësinë e këtij hapi në karrierën e tij: “Derbi i kryeqytetit dhe goli im i parë si profesionist. Jo rezultati që deshëm, por një moment që do ta kujtoj gjithë jetën. Falë Zotit, ky është vetëm fillimi”, ka shkruar ai. Himallari vlerësohet nga specialistët si një nga talentet më të spikatura të akademisë së Partizanit, ndërkohë që kontributin e tij e jep rregullisht edhe në fanellën e kombëtares shqiptare të grupmoshës U19.