Tronditje te Vllaznia e vajzave, largohen dy lojtare kyçe pak javë pas nisjes së kampionatit

Klubi i futbollit të femrave Vllaznia po kalon një periudhë delikate, e cila vjen menjëherë pas sfidave të krijuara në procesin e zgjedhjes së presidentit të ri. Situata në kampin shkodran është komplikuar edhe më shumë për shkak të ndarjes nga dy futbolliste të rëndësishme. Bëhet fjalë për portieren Samantha Isabel Valadez dhe mesfushoren norvegjeze Ine Aas, të cilat kanë paraqitur kërkesën për t'u larguar, një vendim që drejtuesit e klubit e kanë pranuar duke i lënë të lira. Këto largime të papritura, të ndodhura vetëm pak javë pas startit të sezonit të ri, hedhin hije dyshimi dhe sjellin paqartësi në skuadër. Megjithatë, kuqeblutë mbeten një grup me potencial të jashtëzakonshëm në qarkullim, duke mbajtur me merita statusin e kampiones në fuqi për 13 edicione radhazi në futbollin e femrave të Shqipërisë.