Nga New Yorku, Përparim Rama: Kosova mbron dhe lartëson miqësinë e përjetshme me SHBA-në

Kryetari i Kryeqytetit, Përparim Rama, ishte i pranishëm në mbrëmjen gala të organizuar nga Këshilli i Marrëdhënieve Shqiptaro-Amerikane në New York, ku ka përcjellë mesazhin e falënderimit të Kosovës ndaj diasporës sonë të mrekullueshme në Shtetet e Bashkuara. Kreu i Prishtinës bëri të ditur se ky organizim shërbeu për t'i ndarë mirënjohje të merituara figurave kyçe, ku gjenerali Wesley K. Clark u kurorëzua me çmimin “Kalorësi i Skënderbeut” për rolin e tij vendimtar dhe udhëheqjen e treguar gjatë periudhës më kritike të historisë kosovare. Gjithashtu, me çmimin prestigjioz “Nënë Tereza” u shpërblye Bruno Selimaj, si dëshmi e angazhimit dhe përkushtimit të tij shumëvjeçar në shërbim të komunitetit shqiptaro-amerikan. Duke vlerësuar punën e Këshillit të Marrëdhënieve Shqiptaro-Amerikane dhe udhëheqjes së tij, Rama u shpreh mirënjohës për përpjekjet e vazhdueshme në shtrirjen dhe lartësimin e zërit të bashkatdhetarëve tanë në tokën amerikane. Sipas tij, e kaluara dëshmon qartë se bashkimi i forcave mes shqiptarëve të atjeshëm dhe atyre në vendlindje ka qenë çelësi i suksesit për të bërë që kërkesat tona të dëgjohen në rrafshin ndërkombëtar. “Detyra jonë është që këtë kapital historik të miqësisë me Shtetet e Bashkuara ta kthejmë në partneritet edhe më të fuqishëm për të ardhmen, për paqen, demokracinë, zhvillimin dhe gjeneratat që vijnë”, ka shkruar ndër të tjera Rama. Në mbyllje të fjalës së tij, i pari i Prishtinës riafirmoi se Kosova nuk do t'i shlyejë kurrë nga kujtesa ata që i dhanë dorë në momentet kur liria ishte ende një synim për t'u arritur.