Surprizë në tenis: As Alcaraz e As Sinner, gjermani Alexander Zverev kurorëzohet “numri 1” i botës për këtë vit

Përjashtimi i papritur i tenistit spanjoll Carlos Alcaraz nga turneu “Shanghai Masters 1000”, pas humbjes ndaj Zizou Bergs, ka sjellë ndryshime rrënjësore në kreun e renditjes botërore për meshkuj deri në mbyllje të këtij sezoni. Për shkak të këtij rezultati negativ, Alcaraz humbet çdo shans matematikor për të synuar kreun, duke i hapur rrugën tenistit gjerman Alexander Zverev, i cili do ta mbyllë vitin kalendarik në majë të renditjes zyrtare, duke lënë pas edhe italianin Jannik Sinner. Sinner, i cili është tërhequr nga fushat e lojës prej tre muajsh për shkak të një dëmtimi në gjurin e djathtë, e kishte mbyllur sezonin e tij para kohe. Ndërkohë, Zverev, i cili aktualisht pozicionohet i dyti në botë, pritet të zyrtarizohet shumë shpejt në krye të klasifikimit. Që prej themelimit të ATP-së në vitin 1973, ky sukses shënon një ngjarje historike, pasi Alexander Zverev bëhet gjermani i parë dhe lojtari i dymbëdhjetë evropian që siguron vendin e parë botëror në mbyllje të një sezoni. Ai do ta prekë këtë majë në moshën 29-vjeçare, 5-mujore dhe 24-ditore. Një tregues mjaft interesant i këtij kapitulli në tenisin profesionist është se kjo është hera e parë në histori që një sportist e kupton se do ta mbyllë vitin si kreu i renditjes botërore, pa e shijuar më parë këtë pozicion, qoftë edhe për një javë të vetme.