Yamal shkëlqen në Stamboll dhe i përgjigjet me ironi ish-lojtarit të Juventusit pas triumfit në Champions

Barcelona ka konfirmuar formën e saj të frikshme edhe në transfertën e Stambollit, duke vazhduar marshimin e suksesshëm në Ligën e Kampionëve nën drejtimin e trajnerit Hansi Flick. Blaugranët arritën të sigurojnë një fitore të thellë, duke mposhtur Gallatasarajin me katër gola. Protagonisti kryesor i përmbysjes spektakolare në tokën turke ishte talenti Lamine Yamal. Ylli spanjoll udhëhoqi skuadrën drejt suksesit duke dhuruar dy asiste dhe një veprim teknik të jashtëzakonshëm që pushtoi rrjetet sociale, performancë kjo që i dha edhe çmimin e lojtarit më të mirë të ndeshjes. Megjithatë, mbrëmja mori një tjetër rrjedhë edhe jashtë vijave të fushës, ku sulmuesi i Barçës vendosi të dërgojë një mesazh thumbues. Shënjestër e reagimit të tij u bë ish-mesfushori i Juventusit, Mario Lemina. Mospajtimi kishte nisur kohë më parë, kur gjatë një loje virale në rrjet, ku pyetej për të zgjedhur mes Leroy Sane dhe Lamine Yamal, Lemina ishte shprehur se nuk e njihte lojtarin spanjoll. Ky koment dhe tensionet e shfaqura me debate verbale në fushën e blertë gjatë ndeshjes nuk u harruan lehtë nga numri 10 i katalanasve. Pas përfundimit të sfidës, Yamal ka shfrytëzuar rrjetet sociale për të publikuar një fotografi me trofeun e fituar, shoqëruar me një pyetje retorike: "Tani më njeh?". Kështu, fenomeni i ri spanjoll vazhdon të dhurojë spektakël si brenda, ashtu edhe jashtë fushës së lojës.