Superliga e Basketbollit nis me spektakël: Besëlidhja e frikshme, Kamza surprizon Tiranën

Kanë rënë siparin e takimeve hapëse të javës së parë në Superligën e meshkujve në basketboll, duke dhuruar emocione dhe rezultate interesante. Skuadra kampione në fuqi, Besëlidhja, ka treguar forcën e saj që në start, duke triumfuar me rezultatin e thellë 112-52 ndaj Partizanit. Kjo sfidë rezultoi e njëanshme, ku dominimi i lezhjanëve u reflektua edhe në statistika, me gjashtë lojtarë që arritën të shënojnë mbi 10 pikë secili. Në sallën “Fahrie Hoti”, Kamza Basket ka prodhuar surprizën e kësaj jave duke mposhtur Tiranën me shifrat 79-65. Pavarësisht nisjes së mbarë nga bardheblutë si vendas, rrjedha e lojës ndryshoi në çerekun e dytë. Kamzalinjtë menaxhuan epërsinë dhe e thelluan atë deri në fund, falë edhe paraqitjes fantastike të Mohammed, i cili u shfaq vendimtar me 28 pikë të realizuara. Në sfidat e tjera, Teuta ka regjistruar një fitore të rëndësishme në transfertë kundër Flamurtarit me rezultatin 96-82, ku trioja e lojtarëve amerikanë të durrsakëve ishte e pandalshme duke kontribuar me plot 68 pikë së bashku. Ndërkohë, në Shkodër, Vllaznia ka regjistruar një sukses bindës 97-80 ndaj Elbasanit, ndeshje në të cilën shkëlqeu Hibbitt, autor i 29 pikëve për kuqeblutë. Rezultatet e plota të javës së parë në Superligën e meshkujve: Vllaznia – Elbasani, 97-80 Tirana – Kamza Basket, 65-79 Besëlidhja – Partizani, 112-52 Pogradeci – Skënderbeu, 89-119 Pas kësaj jave të parë, tabela e renditjes kryesohet nga skuadrat që kanë nisur rrugëtimin me fitore: Besëlidhja, Vllaznia, Teuta, Kamza Basket dhe Skënderbeu me nga 2 pikë secila. Ndërsa në pozitat e tjera renditen Pogradeci, Tirana, Flamurtari, Elbasani dhe Partizani me nga 1 pikë, si dhe Apolonia me 0 pikë.