Vala e protestave zgjerohet: Studentët e Shkencave të Natyrës braktisin auditorët dhe kërkojnë ndryshim rrënjësor

Valës së protestave të inicuara nga studentët e Mjekësisë i janë bashkuar zyrtarisht edhe kolegët e tyre nga Fakulteti i Shkencave të Natyrës, të cilët kanë vendosur të lënë pas mësimin për t'iu bashkuar tubimit. Organizimi nisi pasi studentët e Mjekësisë ndërmorën një marshim drejt këtij fakulteti, ku përmes thirrjeve të tyre ftuan të rinjtë e tjerë që t'i bashkohen kauzës së tyre përfaqësuese. Edhe pse hyrja e institucionit fillimisht u mbajt e mbyllur, ajo u hap pas pak çastesh, duke mundësuar daljen e masës studentore nga auditorët dhe bashkimin e tyre me protestuesit e tjerë. Mes thirrjeve të përbashkëta, protestuesit kanë shprehur hapur pakënaqësinë ndaj klasës politike, duke brohoritur njëzëri: “Rama në burg, Berisha në burg. Duam revolucion”. Pas tubimit para fakultetit, turma e studentëve ka nisur një marshim të organizuar në drejtim të sheshit “Skënderbej”.