Meloni paralajmëron Uashingtonin: Pakt i rrezikshëm i naftës me Moskën, minon përpjekjet për paqe

Kryeministrja e Italisë, Giorgia Meloni, ka ngritur alarmin këtë të mërkurë, duke e cilësuar marrëveshjen e arritur mes Shteteve të Bashkuara dhe Rusisë për furnizimin me naftë si një lëvizje tejet të rrezikshme që bie ndesh me synimet për të detyruar Vladimir Putinin të nisë bisedimet e paqes me Ukrainën. Pakti, i publikuar javën e kaluar, parashikon që Moska të dërgojë fillimisht mbi 300,000 tonë metrikë naftë në tregjet amerikane dhe ndërkombëtare, një zhvillim që ka ngritur shqetësime në Romë. Duke folur para parlamentit italian në prag të samitit të Bashkimit Evropian, shefja e ekzekutivit italian theksoi se pasojat e këtij vendimi mbeten të paqarta, ndërsa rreziqet janë më se të dukshme. Sipas saj, një hap i tillë i siguron Moskës një formë legjitimiteti pikërisht në kohën kur sulmet ajrore ruse vazhdojnë të shkatërrojnë qytetet ukrainase, duke i siguruar Kremlinit fonde të reja për të ushqyer makinën e luftës dhe duke zbehur ndjeshëm ndikimin e sanksioneve. Nga ana e tij, presidenti amerikan Donald Trump mbrojti marrëveshjen, duke deklaruar se ajo do të sjellë ulje të çmimeve të energjisë në SHBA, një sfidë kjo kyçe për republikanët në prag të zgjedhjeve të rëndësishme të mesit të mandatit që përcaktojnë balancën e pushtetit në Kongres. Gjatë fjalës së saj, Meloni solli në vëmendje edhe nevojën që 27 vendet anëtare të BE-së të caktojnë “një figurë me autoritet” që do të udhëheqë bisedimet evropiane lidhur me konfliktin Rusi-Ukrainë, duke mos përjashtuar mundësinë e një mandati zyrtar për Grupin E3, i cili përbëhet nga Gjermania, Franca dhe Britania e Madhe. “Nëse Franca, Gjermania dhe Britania e Madhe besojnë se mund të bëjnë më mirë vetë sesa mund të bënim ne të gjithë së bashku, dhe deri më tani kjo është zgjedhja që kanë bërë, atëherë të paktën le ta bëjnë këtë në emër të të gjithëve dhe me një mandat zyrtar”, u shpreh ajo.