Akuzë e bujshme nga Londra: Rusia ndërhyri në referendumin e Brexit-it

Një dekadë pas votimit historik për largimin nga Bashkimi Evropian, kreu i ekzekutivit britanik ka drejtuar gishtin nga Kremlini. Ai ka ngritur alarmin se Moska nuk është mjaftuar vetëm me ishullin britanik, por synon të manipulojë skenën politike edhe në shtete të tjera kyçe evropiane, si Gjermania dhe Franca. Kryeministri britanik Andy Burnham ka deklaruar hapur se Rusia ka ushtruar ndikim gjatë procesit referendar për Brexit-in në vitin 2016. Gjatë një paraqitjeje në podkastin “The Rest is Politics”, politikani laburist zbuloi se menjëherë pas marrjes së pushtetit në muajin korrik, ai kërkoi raporte zyrtare nga shërbimet për të verifikuar nëse Kremlini kishte ndërhyrë në atë votim. Sipas tij, konfirmimi nga strukturat kompetente ka qenë kategorik: po, ka pasur cenim të procesit. Me këtë dalje publike, Burnham shënon rastin e parë që një kryeministri britanik konfirmon zyrtarisht përfshirjen ruse në ngjarjen që ndryshoi kursin e vendit. Megjithatë, ai nuk ka ofruar detaje mbi metodat e përdorura apo provat konkrete ku mbështetet ky pretendim, ndërsa mbetet ende e paqartë nëse kjo ndërhyrje ka ndryshuar realisht rezultatin final. Nga ana e saj, Moska i ka mohuar vazhdimisht dhe me forcë pretendime të tilla. Njëkohësisht, kryeministri britanik ka lëshuar një thirrje urgjente për vigjilencë në mbarë Evropën. Ai u shpreh se opinioni publik ende nuk e ka të qartë shkallën e rrezikut dhe përpjekjet e aktorëve të huaj për të minuar demokracitë perëndimore. "Në veçanti, votuesit në Gjermani dhe Francë duhet të hapin sytë dhe të kuptojnë se mjaft prej zhvillimeve politike dirigjohen nga fuqi armiqësore si Rusia," u orvat të paralajmëronte Burnham. Duke bërë një bilanc të dhjetë viteve të fundit, ai theksoi se Britania e Madhe ka kaluar një periudhë stanjacioni dhe polarizimi të thellë shoqëror që prej vendimit për t'u shkëputur nga blloku evropian. Kujtojmë se në vitin 2016, 52 për qind e qytetarëve britanikë mbështetën daljen nga Bashkimi Evropian, një proces që mori formë përfundimtare në vitin 2020. Megjithatë, kryeministri Andy Burnham ka rikthyer në vëmendje debatin rreth një ribashkimi të mundshëm me Bashkimin Evropian. Sipas vlerësimit të tij, shkëputja i ka sjellë Mbretërisë së Bashkuar më shumë humbje sesa përfitime, duke e shoqëruar vendin me ritme anemike ekonomike dhe duke nxitur përçarje të thella brenda shoqërisë.