Incident me armë zjarri në Suharekë: Vihet në pranga i dyshuari, sekuestrohet arsenali

Një ngjarje e rëndë ka shkundur fshatin Peqan të Suharekës, ku një person ka përfunduar në prangat e policisë pasi dyshohet se ka shtënë me armë zjarri në drejtim të një qytetari tjetër. Sipas informacioneve zyrtare të autoriteteve, incidenti ka ndodhur më 11 tetor, kur i dyshuari, shtetas kosovar, ka hapur zjarr ndaj viktimës, po ashtu shtetas kosovar. Pas marrjes së njoftimit, njësitë relevante policore kanë zbarkuar menjëherë në vendngjarje, ndërsa është vënë në dijeni edhe prokurori kompetent, me vendim të të cilit i dyshuari është ndaluar dhe dërguar në mbajtje. Hetuesit policorë kanë vijuar me intensitet veprimet operativo-gjurmuese, ku gjatë kontrollit të detajuar të zonës më 13 tetor, fillimisht është zbuluar një gëzhojë. Pas krehjes së terrenit përreth, në një zonë me shkurre, efektivët kanë lokalizuar dhe sekuestruar një armë zjarri, një karikator, si dhe dy fishekë. Ndaj personit të dyshuar është iniciuar procedura penale për tri vepra të ndryshme: kanosje, armëmbajtje pa leje dhe përdorim i armës së zjarrit.