Ndërhyrje kirurgjikale te Papa Leo XIV: Vatikani zbardh detajet mbi gjendjen shëndetësore të Atit të Shenjtë

Papa Leo XIV po ndiqet nga stafi mjekësor në një spital të Romës, pas një operacioni të suksesshëm të kryer për heqjen e një mase kanceroze në mushkërinë e djathtë. Lajmi është bërë i ditur nga vetë Vatikani, i cili ka konfirmuar se gjendja e tij pas ndërhyrjes është e qëndrueshme. Sipas njoftimit zyrtar të lëshuar të martën në mbrëmje, procedura kirurgjikale ka shkuar sipas parashikimeve dhe Papa Leo XIV është rikthyer në dhomën e tij për fazën e rikuperimit. Ndërhyrja është kryer nën mbikëqyrjen e ekipit mjekësor të përbërë nga Dr. Luigi Carbone dhe Profesor Stefano Margaritora. Në raportin e tyre mjekësor, ekspertët shpjeguan se ndërhyrja në kraharor u realizua nëpërmjet asistencës me video, duke bërë të mundur heqjen e lobit të poshtëm të mushkërisë së djathtë. Operacioni, i cili pati një kohëzgjatje prej rreth 90 minutash, u pasua nga analiza laboratorike që konfirmuan praninë e adenokarcinomës pulmonare, një formë e kancerit të mushkërive. Aktualisht, Papa Leo XIV ndodhet nën kujdesin e vazhdueshëm të mjekëve, ndërsa bota katolike pret informacione të mëtejshme për procesin e tij të shërimit.