Gafa në Komisionin Parlamentar: Deputetët e LVV-së ngatërrojnë Lojërat Mesdhetare me ato Olimpike

Komisioni për Kulturë, Rini, Sport dhe Turizëm zhvilloi të martën mbledhjen e radhës, ku në qendër të vëmendjes ishte shqyrtimi i Projektligjit për ndryshimin dhe plotësimin e Ligjit mbi ndarjet buxhetore për vitin 2026. Pas një debati konstruktiv, anëtarët e komisionit dhanë mbështetjen e tyre unanime për këtë projektligj, duke nënvizuar nevojën për planifikim efikas të mjeteve financiare në sektorët përkatës. Diskutimet u shtrinë edhe te përgatitjet për ngjarjen e madhe sportive që do të mikpritet nga Kosova, mirëpo gjatë kësaj seance u regjistruan disa pasaktësi terminologjike nga ana e përfaqësuesve të Lëvizjes Vetëvendosje. Ndonëse Kosova ka fituar zyrtarisht të drejtën për organizimin e Lojërave Mesdhetare “Prishtina 2030”, deputetët e kësaj partie iu referuan këtij eventi si “Lojëra Olimpike”. Deputetja Adriana Matoshi, duke kërkuar informacione mbi dinamikën e punimeve në stadiumin e Gjilanit, e lidhi vonesën e mundshme të projektit me këtë ngjarje ndërkombëtare. “Kisha propozuar të vizitojmë stadiumin e Gjilanit, pasi punimet kanë ngecur muajt e fundit. Ndoshta është mirë të bisedojmë me ministrin, pasi jemi edhe afër Lojërave Olimpike, për të parë se ku qëndrojnë problemet”, deklaroi Matoshi. I të njëjtit mendim ishte edhe kolegu i saj, Bylbyl Sokoli, i cili gjithashtu është profesor universitar dhe trajner futbolli. Gjatë intervenimit të tij, ai kërkoi sqarime mbi ecurinë e përgatitjeve, duke përdorur të njëjtën terminologji të pasaktë. “Të na informojnë në lidhje me arritjet dhe deri ku kanë mbërritur punimet rreth Lojërave Olimpike”, tha Sokoli. Kjo situatë ka shkaktuar reagime, duke pasur parasysh faktin se bëhet fjalë për Lojërat Mesdhetare “Prishtina 2030”, një projekt madhor infrastrukturor dhe sportiv për të cilin shteti i Kosovës është zotuar të bëjë investime të konsiderueshme në vitet në vijim.