Trazira në zemër të Tiranës: Protestuesit zhvendosen te Pazari i Ri, flakë dhe tym në rrugë

Vala e protestave në kryeqytet ka shënuar një zhvendosje të re, me protestuesit që janë rigrupuar në zonën e Pazarit të Ri. Lëvizjet e tyre pasditen e sotme kanë sjellë tensione të shtuara, të shoqëruara nga djegia e koshave të mbeturinave, të cilët kanë bllokuar qarkullimin dhe kanë mbushur zonën me tym e flakë. Efektivët e policisë janë angazhuar në një operacion për shpërndarjen e turmës dhe shoqërimin e personave të përfshirë në akte të paligjshme. Ndërkohë, një pjesë e pjesëmarrësve në protestë kanë shfrytëzuar rrugicat e ngushta për t'iu shmangur ndërhyrjes së forcave të rendit, duke u shpërndarë me shpejtësi nëpër lagje. Incidentet nuk janë kufizuar vetëm te Pazari i Ri. Edhe në rrugën “Qemal Stafa” është raportuar për djegie të koshave të mbeturinave, të cilët janë vendosur në mes të rrugës si pengesë nga ana e protestuesve. Pavarësisht prezencës së shtuar të policisë në terren, grupet e protestuesve vijojnë të mbeten aktive, duke mbajtur gjallë kundërshtinë e tyre ndaj qeverisë së kryeministrit Edi Rama. Lëvizjet e vazhdueshme të protestuesve dhe ndërhyrjet e policisë kanë mbajtur zonën rreth Pazarit të Ri në një gjendje të tensionuar gjatë gjithë kohës.