Mbyllet ëndrra për Botëror: Kosova ndalet nga Austria në rrugëtimin drejt Brazilit

Rrugëtimi i përfaqësueses së Kosovës në futboll për femra drejt Kampionatit Botëror që do të zhvillohet në Brazil në vitin 2027 ka marrë fund. Pas një përpjekjeje maksimale, vajzat e Kosovës nuk ia dolën të kalojnë pengesën e fundit në fazën e 'play-off'-it, duke u eliminuar nga Austria. Në takimin e kthimit të zhvilluar këtë të martë në territorin austriak, skuadra vendëse ka dominuar lojën, duke siguruar një fitore të thellë me rezultatin 4:0. Austria e nisi furishëm sfidën, duke zhbllokuar rezultatin që në minutën e shtatë përmes Hobingerit. Dominimi i austriakeve vazhdoi edhe në pjesën e dytë të lojës. Puntigam shënoi për 2:0 në minutën e 65-të, ndërsa në minutat e fundit, Kirchberger (86') dhe Campbell (89') vulosën rezultatin përfundimtar, duke shuar çdo shpresë për një përmbysje nga ana e përfaqësueses sonë. Ky eliminim vjen pas humbjes së regjistruar edhe në ndeshjen e parë, të zhvilluar të premten e kaluar në Prishtinë, ku Kosova u mposht me rezultatin 2:1. Me dy humbje në total, Kosova i jep lamtumirën kualifikimeve për këtë kompeticion prestigjioz botëror.