Dinamikat brenda Vetëvendosjes: Liburn Aliu largohet nga pushteti, djali i tij vijon karrierën në kabinetin e Konjufcës

Ndërkohë që Liburn Aliu i dha fund rrugëtimit të tij në Qeverinë Kurti përmes një largimi të bujshëm të motivuar nga mospajtime politike, familja e tij mbetet e lidhur ngushtë me strukturat e pushtetit aktual. Ene Aliu, djali i ish-ministrit, figuron aktualisht si pjesë e kabinetit të Glauk Konjufcës, duke mbajtur postin e “Këshilltarit Politik për Diplomaci Digjitale” në Ministrinë e Punëve të Jashtme dhe Diasporës. Ky angazhim e vendos Ene Aliun në një pozitë të drejtpërdrejtë bashkëpunimi me Konjufcën, i cili konsiderohet si një ndër figurat më të fuqishme të Lëvizjes Vetëvendosje, subjekt ky ku babai i tij, Liburn Aliu, për vite me radhë ka qenë një nga shtyllat kryesore të vendimmarrjes. Emri i Eneut shfaqet zyrtarisht në listën e këshilltarëve politikë të këtij dikasteri, duke dëshmuar vazhdimësinë e prezencës së familjes Aliu në nivelet e larta të administratës shtetërore. Largimi i Liburn Aliut në gusht të vitit 2025 nuk ishte një akt i papritur, por kulmi i një serie fërkimesh të brendshme. Si një nga bashkëpunëtorët më të hershëm të Albin Kurtit, pozita e Aliut brenda partisë kishte pësuar zbehje të dukshme, duke e lënë atë gradualisht jashtë qendrës së vendimmarrjes partiake, pavarësisht mbajtjes së postit ministror. Një nga përplasjet më të hapura ndodhi në qershor të vitit 2024, kur Aliu kundërshtoi publikisht qasjen e Qeverisë ndaj zgjedhjeve në Luginën e Preshevës. Ai e vlerësoi si gabim mbështetjen e njëanshme të kryeministrit Kurti për një subjekt të caktuar politik, duke kërkuar një qasje më përbashkuese. Ky qëndrim kritik, i shprehur hapur në media, shënoi një krisje të thellë në raportet e tij me lidershipin e partisë. Sfondi i tensioneve u thellua edhe nga mungesa e një mbrojtjeje publike nga ana e subjektit për Aliun, gjatë kohës që ai ishte subjekt i hetimeve nga prokuroria, ndryshe nga mbështetja që partia u ofronte figurave të tjera të profilit të lartë. Situata arriti pikën e vlimit pas zgjedhjes së Dimal Bashës në krye të Kuvendit, një zhvillim që Aliu e pa si të papajtueshëm me idealet e tij politike. Duke e konsideruar zgjedhjen e Bashës si veprim që binte ndesh me vizionin e tij për Republikën, Liburn Aliu njoftoi dorëheqjen nga posti i ministrit të Mjedisit, Planifikimit Hapësimor dhe Infrastrukturës, vetëm një ditë pas votimit në Kuvend. Aktualisht, përderisa Liburn Aliu e ka orientuar karrierën e tij drejt Shqipërisë, duke marrë detyrën e Drejtorit të Portit të Durrësit, djali i tij, Ene Aliu, vazhdon të jetë pjesë e aparatit diplomatik nën drejtimin e Glauk Konjufcës.