Kurti dhe kreu i AKP-së në fokus të mbrojtjes së pasurive shtetërore dhe funksionimit të Fondit Sovran

Kryeministri i Republikës së Kosovës, Albin Kurti, zhvilloi një takim pune me kryesuesin e Bordit të Drejtorëve të Agjencisë Kosovare të Privatizimit (AKP), Hekuran Nikçi. Takimi u fokusua në menaxhimin efikas dhe ruajtjen e aseteve të ndërmarrjeve shoqërore, adresimin e kontesteve pronësore, si dhe përcaktimin e dinamikës për mbylljen e mandatit të këtij institucioni. Një pjesë e rëndësishme e bashkëbisedimit i është kushtuar pronave të ndërmarrjeve shoqërore të Kosovës që ndodhen në territorin e Serbisë. Në këtë drejtim, u potencua domosdoshmëria e evidentimit, dokumentimit të saktë dhe mbrojtjes ligjore të këtyre pasurive të rëndësishme shtetërore. Në njoftimin e Zyrës së Kryeministrit u bë e ditur se është diskutuar edhe për dështimin e Serbisë në zbatimin e Marrëveshjes për Kadastrin, të nënshkruar në Bruksel më 2 shtator 2011. Megjithëse Bashkimi Evropian ka mbështetur këtë proces me rreth 2 milionë euro, Serbia vazhdon të mbajë dokumentacionin kadastral të marrë nga Kosova, duke penguar kështu garantimin e sigurisë juridike dhe zgjidhjen e çështjeve pronësore. Palët shqyrtuan gjithashtu ndryshimet e nevojshme legjislative dhe institucionale që do të shërbejnë si gurthemel për përmbylljen e punës së AKP-së. Ky proces parashihet të finalizohet me kalimin e aseteve në Fondin Sovran, me qëllim që pasuria publike të menaxhohet në mënyrë më të qëndrueshme dhe të shndërrohet në një motor zhvillimi për ekonominë e vendit.