Gjilani i kthehet fitoreve, mposht bindshëm Drenicën

Gjilani i është kthyer fitoreve në Kampionatin e Kosovës. Skuadra gjilanase, para shikuesve të vet, ka triumfuar me rezultat bindës 3:0 ndaj Drenicës së Skenderajt. Këto janë tri pikë të mëdha për Gjilanin, i cili po kalonte një krizë rezultatesh, ndërsa Drenica ka zhgënjyer me paraqitjen e saj. Armend Thaqi ishte i saktë nga pika e bardhë në minutën e 22-të, duke i dhënë Gjilanit epërsinë prej 1:0. Në minutën e 65-të, Mevlan Zeka shënoi nga afërsia për rezultatin 2:0. Zeka realizoi sërish në minutën e 86-të, duke vulosur fitoren e Gjilanit me rezultat 3:0. Nga ana tjetër, Drenica pati mundësinë të rikthehej në lojë, por Aurel Limani dështoi të shënonte nga penalltia në minutën e 50-të. Pas javës së nëntë në elitën e futbollit të Kosovës, Gjilani ngjitet në pozitën e tretë me 14 pikë, ndërsa Drenica mbetet në vendin e shtatë me 10 pikë.